Skilnaður að borði og sæng

Til að fá skilnað að borði og sæng þarf að gera samkomulag um eftirfarandi atriði:

• forsjá og lögheimili barna
• umgengni
• meðlagsgreiðslur
• lífeyrisgreiðslur
• fjárskipti, það er hvernig skipta á sameiginlegum eignum

Við erum að vinna í þessum atriðum núna.

• forsjá og lögheimili barna

Við verðum með sameiginlega forsjá en eins og staðan er í dag þá verða börnin með lögheimili hjá mér.

• umgengni

Eins og áður hefur komið fram þá er erfitt fyrir okkur (vegna búsetu) að koma því í kring að börnin verði jafnt hjá okkur foreldrunum (getum t.d. ekki skipst á með viku hér og viku þar). Aftur á móti þykir okkur báðum önnur hvor helgi hjá Manninum of lítil umgengni fyrir bæði föður og börn. Við ætlum því að skoða skóladagatal næsta skólaárs og setja okkur niður eitthvert skipulag þar sem hann fær þau til sín í lengri fríum. Mér datt líka í hug að hægt væri að fá frí fyrir börnin í skólanum einn og einn föstudag ef vel stendur á hjá Manninum (sem er í námi) til að lengja helgina frá fimmtudegi til sunnudags.

• meðlagsgreiðslur

Við höfum ekki skoðað þær neitt sérstaklega. Eru ekki fyrirfram ákveðnar reglur um þetta?

• lífeyrisgreiðslur

Höfum heldur ekki skoðað þetta en mér skilst að þetta atriði þurfi einna helst að skoða ef annar aðilinn hefur unnið úti um árabil en hinn verið heima !?

• fjárskipti

Þetta þarf líka að skoða. T.d. kemur inn í þetta arfur sem Maðurinn fékk og það sem við höfum heyrt um þau mál ber ekki saman. Annars vegar að arf sé hægt að undanskilja frá öðrum eignum en hins vegar að allt sem hjón eigi komi til jafnra skipta, nema um annað sé samið fyrir hjónabandið eins og t.d. með kaupmála. Arfurinn kom til eftir að við giftum okkur.

Ef einhver sem les þetta veit meira en ég/við um eitthvað af ofantöldum atriðum þá eru allar ábendingar vel þegnar.

Athugasemdir

[Rebbý, 4.5.2008 kl. 20:47]

ég er svosem ekki fullnuma þrátt fyrir skilnaðinn minn, en arfinn minn eftir pabba fékk ég að halda (þó pabbi hafi fallið frá meðan á hjónabandinu stóð) og lögfræðingur hans reyndi ekki að mótmæla því.
meðlagsgreiðslur eru fyrirfram ákveðin upphæð og maki getur farið fram á lífeyrisgreiðslur bæði ef það er eins og þú bentir á að annar aðilinn hafi verið heima við en líka ef tekjur eru mjög misjafnar.
gangi ykkur vel í þessu ferli .... hellingur að fara yfir.

[Ein-stök, 4.5.2008 kl. 21:19]

Rebbý: Mér finnst þetta sanngjarnt með arfinn eftir pabba þinn. Við höfum eiginlega verið í hálfgerðu "öfugu rifrildi" um þetta atriði því ég hef sagt að mér finnist ekki sanngjarnt að ég taki helminginn af arfinum hans en hann segir á móti að honum finnist ekki sanngjarnt að ég fái ekkert af honum. Í okkar tilfelli er arfurinn einu fjármunirnir sem við eigum fyrir utan tvo skuldlausa bíla (sem samanlagt eru um sjöhundruð þúsund króna virði) - kannski þess vegna sem honum finnst það "harkalegt" að ég fái ekkert af arfinum. Ég býst við að þetta sé eitt af þessum atriðum sem eru til lög yfir en hægt að semja um á annan hátt. Það þarf bara að vera skjalfest.

Takk fyrir athugasemdina og góðar kveðjur

[Sporðdrekinn, 5.5.2008 kl. 16:23]

Gangi þér vel með allt þetta. Knús